नेपाल सरकारले हप्तामा दुई दिन सार्वजनिक बिदा दिने महत्वपूर्ण निर्णय गरेको छ। आज बसेको मन्त्रिपरिषद् बैठकले देशभर लागू हुने गरी शनिबार र आइतबार सार्वजनिक बिदा दिने निर्णय गरेको हो।
सरकारका प्रवक्ता सस्मित पोखरेलका अनुसार पेट्रोलियम पदार्थको बढ्दो अभाव र अन्तर्राष्ट्रिय बजारमा भइरहेको मूल्यवृद्धिलाई ध्यानमा राख्दै यस्तो निर्णय गरिएको हो। इन्धन खपत घटाउने, सार्वजनिक खर्च नियन्त्रण गर्ने तथा ऊर्जा व्यवस्थापनलाई प्रभावकारी बनाउने उद्देश्यले यो कदम चालिएको जनाइएको छ।
यो निर्णय आगामी चैत २३ गतेदेखि लागू हुने बताइएको छ। यसअन्तर्गत सरकारी कार्यालय तथा शैक्षिक संस्थाहरू हप्तामा दुई दिन बन्द रहनेछन्। यसले दैनिक आवतजावतमा हुने इन्धन खपत घट्ने तथा वातावरणीय प्रभाव समेत सकारात्मक हुने अपेक्षा गरिएको छ।
त्यसैगरी, सरकारी तथा शैक्षिक क्षेत्र बाहेकका संस्थाहरूका लागि पनि कार्यसमय निर्धारण गरिएको छ। अब ती संस्थाहरू बिहान ९ बजेदेखि बेलुका ५ बजेसम्म मात्र सञ्चालन गर्नुपर्नेछ। यसले निजी क्षेत्रलाई पनि ऊर्जा बचतमा योगदान गर्न प्रोत्साहित गर्ने विश्वास सरकारको रहेको छ।
सरकारको यस निर्णयप्रति विभिन्न क्षेत्रबाट मिश्रित प्रतिक्रिया आएका छन्। केहीले ऊर्जा संकट समाधानतर्फ सकारात्मक कदम भएको बताएका छन् भने केहीले आर्थिक गतिविधिमा असर पर्ने चिन्ता व्यक्त गरेका छन्।
यद्यपि, वर्तमान परिस्थितिमा ऊर्जा व्यवस्थापनलाई प्राथमिकता दिँदै सरकारले दीर्घकालीन समाधानको रूपमा यस नीति लागू गरेको स्पष्ट पारेको छ।
त्यस्तै, शैक्षिक कार्यक्रम यहि बैशाख १५ गतेदेखि सुरु हुने जनाइएको छ। त्यस्तै, डिजेल तथा पेट्रोलको गाडीलाई विद्युतीय गाडीमा परिवर्तन गर्न कानुनी व्यवस्था बनाउने निर्णय गरिएको छ।
स्रोत : बिजपाटी
