नेपालगञ्ज — प्रत्येक पूर्णिमाको दिन राप्ती नदीलाई गंगा मान्दै भव्य रूपमा आयोजना हुँदै आएको राप्ती गंगा महा आरती यसपटक पनि निरन्तरता पाउने भएको छ।
आयोजकहरूका अनुसार श्री संवत् २०८२ कार्तिक १९ गते (बुधबार, शुक्ल पूर्णिमा) साँझ ठीक ५:१५ बजे राप्ती गंगा तटमा यो पावन कार्यक्रम सम्पन्न हुने भएको छ।
राप्ती नदी किनारमा दीप प्रज्वलन, घण्टी-शंखध्वनि र वैदिक मन्त्रोच्चारणसहित हुने यो आरतीमा हजारौं भक्तजन सहभागी हुने अपेक्षा गरिएको छ। “पूर्णिमाको चन्द्रमाले राप्ती जलमा प्रतिबिम्बित हुँदा गंगा स्नानको पुण्य प्राप्त हुन्छ,” आयोजक समितिका कोषाध्यक्ष विनय चन्द गुप्ताले बताए। यसअघिका कार्यक्रमहरूमा नेपालगञ्जवासी मात्र होइन, भारतको रूपैडिहा, नानपारा र बहराइचबाट पनि भक्तहरू आउने गरेका छन्।
नेपाली पात्रोअनुसार विक्रम संवत् २०८२ को कार्तिक पूर्णिमा ठीक १९ गते परेको छ। कार्यक्रमको निमन्त्रणा सामाजिक सञ्जालमार्फत व्यापक रूपमा फैलिएको छ ।
सर्वसाधारणलाई समयमै उपस्थित भई आरतीमा सहभागी हुन आयोजकले हार्दिक अनुरोध गरेका छन्। “आरतीको ज्योति हेर्दै मन शान्त हुन्छ, पुण्यको भागीदार बन्नुहोस्,” निमन्त्रणामा उल्लेख छ।
यस्तै यो कार्यक्रमले नेपालगञ्जको धार्मिक पर्यटनलाई थप उचाइ दिने विश्वास गरिएको छ।
