थाइल्याण्डको पटायामा हालै सम्पन्न १२औँ विश्व स्ट्रेन्थ लिफ्टिङ एण्ड इन्क्लाइन बेन्च प्रेस च्याम्पियनसिपमा नेपालगञ्जका खेलाडीले उत्कृष्ट प्रदर्शन गर्दै १४ पदक जितेर कीर्तिमान कायम गरेका छन्। बाँके जिल्लाबाट प्रतिनिधित्व गरेका तीन खेलाडीले विश्वका शीर्ष खेलाडीहरूलाई उछिन्दै स्वर्ण, रजत र कांस्य पदक हासिल गरेका छन्।
नेपालगञ्ज-१२, कोरियानपुरका करण बाडियाले ६० किलो तौल समूहको सिनियरतर्फ स्ट्रेन्थ लिफ्टिङ एण्ड इन्क्लाइन बेन्च प्रेसमा रजत पदक र ह्याक लिफ्टमा स्वर्ण पदक जिते। उनले २२० किलोग्राम तौल उठाएर यो उपलब्धि हासिल गरे। यसअघि सन् २०२४ मा कजाकिस्तानमा भएको ११औँ विश्व च्याम्पियनसिपमा पनि उनले स्वर्ण पदक जितेका थिए।। एक्स्ट्रिम फिटनेस नेपालगञ्ज प्रा.लि.का सदस्य स्वर्ण पदक जितेर नेपालको नाम उँचो बनाएका थिए।
यस्तै, नेपालगञ्ज-७, डीएसपी रोडका मोहित गुप्ताले ६८ किलो तौल समूहमा सिनियरतर्फ स्ट्रेन्थ लिफ्टिङ एण्ड इन्क्लाइन बेन्च प्रेसमा स्वर्ण र ह्याक लिफ्टमा कांस्य पदक प्राप्त गरे। त्यसैगरी, नेपालगञ्ज-२, घरवारीटोलका सन्तोष काजी शाक्यले ७६ किलो तौल समूहमा रजत पदक जिते।
प्रतियोगितामा नेपालबाट ९ जना खेलाडी सहभागी थिए, जसमा बाँकेबाट ३ र अन्य जिल्लाबाट ६ जना थिए। नेपाली टोलीले ७ स्वर्ण, ५ रजत र २ कांस्य गरी कुल १४ पदक जित्न सफल भयो। टिम इभेन्टमा नेपालले दोस्रो स्थान हासिल गर्यो।
विजेता करण बाडियाले यो उपलब्धिले नेपालको खेल क्षेत्रमा नयाँ आयाम थपेको बताए। उनले भने, “हाम्रो टोलीको यो सफलताले नेपालगञ्ज र समग्र नेपालको सम्मान विश्वमञ्चमा उँचो भएको छ। हामीले देखाएको समर्पण र क्षमताले नेपाली खेलाडीको पहिचानलाई थप बलियो बनाएको छ।”
यो ऐतिहासिक सफलताले नेपाली खेलाडीको समर्पण र क्षमतालाई विश्वसामु उजागर गरेको छ, जसले नेपालको खेलकुद क्षेत्रमा थप प्रेरणा प्रदान गर्ने बाडियाले बताए ।
करण बाडिया एक्स्ट्रिम फिटनेस नेपालगञ्ज प्रा.लि.का सदस्य हुन्, जहाँ उनले कठिन प्रशिक्षण र अनुशासित जीवनशैली अपनाएर आफूलाई विश्वस्तरीय खेलाडीको रूपमा स्थापित गरेका छन्। उनको प्रशिक्षणमा नियमित तौल उठाउने अभ्यास, शारीरिक सहनशक्ति वृद्धि, र मानसिक दृढताको विकासमा जोड दिइन्छ। करणले आफ्नो प्रशिक्षणमा विशेष ध्यान पोषण, विश्राम, र तकनिकी सुधारमा दिने गरेको बताएका छन्। उनको प्रशिक्षणमा ह्याक लिफ्ट र इन्क्लाइन बेन्च प्रेस जस्ता कठिन विधाहरूमा विशेष जोड हुन्छ, जसले उनलाई विश्वस्तरमा प्रतिस्पर्धा गर्न सक्षम बनाएको छ।
करणको प्रशिक्षण केवल शारीरिक तयारीमा मात्र सीमित छैन, उनले नेपालगञ्जका युवाहरूलाई खेलकुदप्रति प्रेरित गर्न पनि महत्त्वपूर्ण भूमिका खेलेका छन्। उनको मेहनत र लगनशीलताले बाँके जिल्लालाई स्ट्रेन्थ लिफ्टिङको नक्सामा स्थापित गरेको छ। उनले आफ्नो प्रशिक्षणको सफलताको श्रेय आफ्ना प्रशिक्षक, परिवार, र एक्स्ट्रिम फिटनेस टिमलाई दिएका छन्।
करण बाडियाको प्रशिक्षण र उनको विश्वस्तरीय उपलब्धिले नेपालगञ्जलाई गर्वको अवसर प्रदान गरेको छ, र उनको यो यात्राले अन्य खेलाडीहरूलाई पनि प्रेरणा दिने निश्चित छ।
