अमेरिकन एयरलाइंसको विमान AA3023 मा शनिवार डेनवर अन्तर्राष्ट्रिय विमानस्थलमा उडान भर्ने क्रममा ल्यान्डिङ गियरमा आगलागी भएको छ। बोइंग ७३७ म्याक्स विमान मियामीका लागि रनवे ३४एल बाट उडान भर्ने तयारीमा थियो, तर ल्यान्डिङ गियरको टायरमा समस्या आएपछि विमान रनवेमै रोकिएको थियो।
डेनवर फायर डिपार्टमेन्टका अनुसार, आगलागी नियन्त्रणमा लिइसकिएको छ। विमानमा सवार १७३ यात्रु र ६ चालक दलका सदस्यलाई सुरक्षित रूपमा बाहिर निकालिएको छ। घटनास्थलमा पाँच जनाको स्वास्थ्य जाँच गरिएको थियो, तर उनीहरूलाई अस्पताल लैजानु परेन। यद्यपि, गेटमा एक व्यक्तिलाई सामान्य चोटका कारण अस्पताल लगिएको छ।
फ्लाइटअवेयरका अनुसार, उक्त विमान दिउँसो १:१२ बजे गेट C34 बाट उडान भर्ने तयारीमा थियो, तर दिउँसो २:४५ बजे टेकअफका क्रममा ल्यान्डिङ गियरमा समस्या देखिएको जानकारी प्राप्त भएको थियो। यात्रुहरूलाई बसमार्फत टर्मिनलमा पुर्याइएको छ।
अमेरिकन एयरलाइंसले विमानमा टायरसम्बन्धी मर्मतको समस्या भएको पुष्टि गर्दै उक्त विमानलाई सेवाबाट हटाएको र मर्मत टोलीले जांच गरिरहेको जनाएको छ। फेडरल एविएसन एडमिनिस्ट्रेसन (FAA) ले पनि यो घटनाको अनुसन्धान सुरु गरेको छ।
