नेपालगञ्ज, ३ साउन २०८२ । विवादका बीच पनि श्री बागेश्वरी मन्दिरको पूर्वपट्टि अवस्थित सिद्ध पोखरीमा रहेको जुङ्गे खडेश्वर महादेवको नयाँ मूर्ति यही साउनको पहिलो सोमबार, कामिका एकादशीका दिन प्राणप्रतिष्ठा गरी सर्वसाधारणका लागि दर्शन खुला गरिने भएको छ।
मन्दिरको शिरमा शिखर स्वरूपमा राख्न अमरनाथ ट्रेड्सका प्रोप्राइटर अमरनाथले ५१ किलो तौल र ११ फिट लम्बाइको भव्य त्रिशूल प्रदान गरेका छन्। यो त्रिशूल जुङ्गे खडेश्वर महादेव मन्दिरको शिरमा स्थापना गरिएको छ, जसले मन्दिरको गरिमालाई थप बढाएको शक्तिपीठ माता बागेश्वरी व्यवस्थापन समितिका सदस्य सुनिल सिंह हमालले बताए।
प्राणप्रतिष्ठाको विशेष समारोह साउनको पहिलो सोमबार आयोजना हुने र सोही दिनदेखि भक्तजनहरूका लागि मन्दिर खुला गरिने जानकारी प्राप्त भएको छ। यो समारोहले स्थानीय भक्तजन र श्रद्धालुहरूमा उत्साह थपेको हमालले बताए ।
पुराणअनुसार, कामिका एकादशीको व्रतले यमलोकको दर्शनबाट मुक्ति मिल्छ र भक्तलाई वैकुण्ठको बाटो खुल्छ। एकपटक ऋषिहरूले भगवान् विष्णुलाई यो एकादशीको महत्व सोध्दा, उहाँले यसको व्रतले सहस्र गोदानको फल प्राप्त हुने बताउनुभएको थियो।
पाप नाशक: कामिका एकादशीको व्रतले समस्त पापहरू नाश हुने र पुण्य प्राप्त हुने विश्वास छ। यो व्रतले मन, शरीर र आत्मालाई शुद्ध बनाउँछ।
जुङ्गे खडेश्वर महादेवसँग सम्बन्ध: नेपालगञ्जको सिद्ध पोखरीस्थित जुङ्गे खडेश्वर महादेवको मूर्ति प्राणप्रतिष्ठा यसै दिन गरिँदैछ, जसले यो दिनको महत्वलाई थप विशेष बनाएको छ।
