सहकर्मी : सन्तोष शुक्ल
रुपईडीहा (बहराइच, भारत)। भारत-नेपाल अन्तर्राष्ट्रिय सीमा अन्तर्गत रुपईडीहा चेक पोस्टमा सुरक्षा निकायहरूको सतर्कताका कारण एक गम्भीर मानव तस्करीको प्रयास असफल भएको छ। एसएसबी (सशस्त्र सीमा बल) को बीआईटी टोली, एण्टी ह्युमन ट्राफिकिङ युनिट र देहात संस्थाकी निर्मलाको संयुक्त कारबाहीमा १५ वर्षीया नाबालिग नेपाली किशोरीलाई सुरक्षित उद्धार गरिएको छ भने एक युवकलाई शंका लागेर हिरासतमा लिइएको छ।
जानकारी अनुसार सोमबार दिउँसो करिब १:३० बजे नियमित जाँचको क्रममा चेक पोस्टमा किशोरीको व्यवहार संदिग्ध देखिएको थियो। गहन सोधपुछमा किशोरीले आफ्नो नाम सीरू दमाई (१५ वर्ष), नेपालको जुम्ला जिल्ला चाना वडा नं. ०१ की बासिन्दा भएको बताइन्। कागजात र बयानका आधारमा उनको उमेर नाबालिग पुष्टि भएपछि सुरक्षा निकायले घटनालाई गम्भीरतापूर्वक लिए।
जाँचका क्रममा किशोरीसँगै रहेका युवकले आफ्नो नाम साहिल कुरेशी (१९ वर्ष), नेपालको बाँके जिल्ला खजुरा वडा नं. ०७ का बासिन्दा भएको बताए। सोधपुछमा उनले किशोरीलाई विवाह र रोजगारीको प्रलोभन देखाएर भारत लैजान लागेको स्वीकार गरे। महिला प्रहरीको रोहबरमा बयान लिइएकोमा किशोरीले कुनै शारीरिक शोषण नभएको बताइन् तर नाबालिग भएकाले मानव तस्करीको आशंकामा कारबाही अघि बढाइयो।
सुरक्षा निकायले किशोरीकी आमासँग मोबाइलमार्फत सम्पर्क गरे। आमाले छोरी घरबाट बिना जानकारी निस्किएको बताइन्। आवश्यक प्रक्रिया पूरा गरेपछि किशोरीलाई एनजीओ देहात इण्डिया, बहराइचको सहयोगमा नेपालको संरक्षण गृहमा हस्तान्तरण गरियो। संदिग्ध युवकलाई थप कानुनी कारबाहीका लागि नेपाल प्रहरीको जिम्मा लगाइएको छ।
यसैगरी यस संयुक्त अभियानमा एसएसबी ४२औं वाहिनीको एण्टी ह्युमन ट्राफिकिङ टोली, महिला प्रहरी तथा सम्बन्धित सामाजिक संस्थाहरूको महत्वपूर्ण भूमिका रहेको थियो। प्रशासनले सीमा क्षेत्रमा मानव तस्करी रोक्न निरन्तर निगरानी र जाँच अभियान चलिरहने स्पष्ट पारेको छ।
